Қызметкерлердің кибергигиенасы — «Қазтелерадио» АҚ ақпараттық қауіпсіздігінің негізі

Қазіргі цифрлық әлемде ақпараттық қауіпсіздік кез келген компанияның тұрақты жұмысының ажырамас бөлігіне айналуда. «Қазтелерадио» АҚ үшін телерадиохабар таратудың ұлттық операторы ретінде корпоративтік ақпаратты және цифрлық инфрақұрылымды қорғаудың маңызы ерекше.

Қоғамда қызметкерлердің кибергигиена деңгейін және ақпараттық қауіпсіздік саласындағы хабардарлығын арттыру мақсатында қызметкерлерді деректерді қорғаудың негізгі ережелеріне және цифрлық ортада қауіпсіз жұмыс істеуге оқыту бойынша жүйелі жұмыс жүргізілуде.

Оқытудың негізгі бағыттары

Оқыту іс-шаралары аясында қызметкерлер «Қазтелерадио» АҚ-ның Ақпараттық қауіпсіздік саясатының негізгі талаптарымен, сондай-ақ қазіргі таңдағы ең көп таралған киберқатерлермен танысады.

Келесі тақырыптарға ерекше назар аударылады:

сенімді парольдер жасау және парольдік саясатты сақтау;

фишингтік хаттарды және интернет-алаяқтықты тану;

электрондық поштамен қауіпсіз жұмыс істеу;

антивирустық бағдарламалық қамтамасыз етуді пайдалану;

ақпараттың алынбалы тасығыштарымен жұмыс істеу ережелері;

қашықтан қол жеткізуді ұйымдастыру тәртібі;

жасанды интеллект жүйелерін қауіпсіз пайдалану;

ақпараттық қауіпсіздік оқиғалары анықталған кездегі қызметкерлердің іс-әрекеттері.

Бұл неліктен маңызды?

Кибероқиғалардың көпшілігі адам факторына байланысты орын алады. Тіпті заманауи техникалық қорғаныс құралдары да пайдаланушылардың қырағылығы мен жауапкершілігінсіз қауіпсіздікті толық қамтамасыз ете алмайды.

Фишингтік шабуылдар, зиянды бағдарламалар, деректердің жылыстауы және рұқсатсыз кіру әрекеттері барған сайын күрделеніп барады және қызметкерлерден жоғары цифрлық сауаттылықты талап етеді. Дәл сондықтан кибергигиенаның негізгі ережелерін сақтау — әрбір қызметкердің корпоративтік деректерді қорғауға және Қоғамның орнықты жұмысына қосқан үлесі.

Жасанды интеллектіні қауіпсіз пайдалану

ЖИ-сервистерін пайдалану мәселелеріне ерекше көңіл бөлінеді. Қызметкерлерге мұндай жүйелермен қауіпсіз жұмыс істеу ережелері, оның ішінде құпия ақпаратты, дербес деректерді және қызметтік құжаттарды бөгде сервистерге беруге тыйым салынатыны түсіндіріледі. Жасанды интеллектіні (ЖИ) пайдалануға тек ақпараттық қауіпсіздіктің ішкі талаптары аясында және рұқсат етілген міндеттер үшін ғана жол беріледі.

Ортақ жауапкершілік

Ақпараттық қауіпсіздік — бұл тек бейінді бөлімшелердің міндеті ғана емес, сонымен бірге әрбір қызметкердің ортақ жауапкершілігі.

«Қазтелерадио» АҚ киберқауіпсіздік мәдениетін дамыту, қызметкерлердің цифрлық сауаттылығын арттыру және корпоративтік ақпараттық ортаның қорғанысын нығайту бойынша жұмысты жалғастыра береді.